ગેસની અછત વચ્ચે વેપારીઓએ હવે વિકલ્પ તરીકે કોલસાની સગડી તરફ વળવાનું શરૂ કર્યું છે. શહેરમાં વેલ્ડિંગ સહિતનું કામ કરતાં કારીગરો પાસે સગડી બનાવડાવવા માટે ધંધાર્થીઓની લાઈનો લાગી રહી છે.

ઈરાન-ઈઝરાયલ યુદ્ધની પરિસ્થિતિને કારણે ભુજમાં પણ કોમર્શિયલ ગેસ સિલિન્ડરની અછત સર્જાતાં શહેરના ધંધાર્થીઓ મુશ્કેલીમાં મુકાયા છે. ખાસ કરીને રેસ્ટોરન્ટ, હોટલ અને ચાની કેબિનો ચલાવતા વેપારીઓ માટે રસોઈ ગેસ વિના વ્યવસાય ચલાવવો કઠિન બની રહ્યો છે. અનેક સ્થળોએ ગેસ સિલિન્ડર સમયસર ન મળતાં શટર ડાઉન કરવાની ફરજ પડી રહી છે, જેના કારણે રોજગારમાં પણ તેની સીધી અસર જોવા મળી રહી છે.

ત્યારે ગેસની અછત વચ્ચે વેપારીઓએ હવે વિકલ્પ તરીકે કોલસાની સગડી તરફ વળવાનું શરૂ કર્યું છે. શહેરમાં વેલ્ડિંગ સહિતનું કામ કરતાં કારીગરો પાસે સગડી બનાવડાવવા માટે ધંધાર્થીઓની લાઈનો લાગી રહી છે. નાના-મોટા હોટલ વ્યવસાયીઓથી લઈને ચાની લારીઓ ધરાવતા વેપારીઓ સુધી સૌ કોઈ તાત્કાલિક સગડી તૈયાર કરાવવા માટે કારીગરો પાસે દોડી રહ્યા છે, જેને કારણે કારીગરોને પણ તડાકો બોલી રહ્યો છે.

ભુજના કારીગરો પૈકી તોસિક થેબાએ જણાવ્યું હતું કે, હાલમાં ખાસ કરીને કોમર્શિયલ ગેસ સિલિન્ડરની શહેરમાં અછત સર્જાઈ છે. જેને કારણે સ્વાભાવિક પણે જ હોટલ, રેસ્ટોરન્ટ, ચાની રેંકડીઓ સહિતના વેપારીઓને ગેસના અભાવે મુશ્કેલીનો સામનો કરવો પડે. ત્યારે હવે ધંધા રોજગાર બંધ ન કરવા પડે તે માટે તેઓએ ગેસના વિકલ્પ તરીકે સગડીની ખરીદી કરવાનો નિર્ણય કર્યો છે.

પરિણામે હાલ દરરોજ નાની અને મોટી મળી 16થી વધુ સગડીનું વેચાણ થઈ રહ્યું છે. હાલમાં રૂપિયા 1500થી લઈને રૂપિયા 25,000 સુધીની વિવિધ સાઈઝ અને ડિઝાઈનની સગડીઓની માગમાં ભારે ઉછાળો આવ્યો છે. વધતી માગને કારણે કારીગરોને અત્યારે સારો ધંધો મળી રહ્યો છે. અંતમાં તેમણે જે રીતે સગડીની માગમાં વધારો થયો છે તેને ધ્યાને લઈને સૌ કારીગરોએ લોખંડના ડેલા, બારણા, દરવાજા, ખડકી અને દુકાનોના શટર બનાવવા સહિતની કામગીરી હાલ પૂરતી બાજુએ મૂકી સંપૂર્ણ ધ્યાન સગડી બનાવવામાં કેન્દ્રીત કર્યું છે. ગેસની અછત કેટલો સમય રહેશે તેની અનિશ્ચિતતા વચ્ચે હાલ તો કોલસાની સગડી વેપારીઓ માટે જીવન રક્ષક સાબિત થઈ રહી હોય તેવું સ્પષ્ટપણે લાગી રહ્યું છે.

ગીર સોમનાથના તાલાલા પંથકમાં સોશિયલ મીડિયા પર પોતાની અનોખી સ્ટાઈલથી જાણીતો બનેલો યુટ્યુબર “રોયલ રાજા” ફરી એકવાર કાયદાકીય સકંજામાં ફસાયો છે

ગીર સોમનાથના તાલાલા પંથકમાં સોશિયલ મીડિયા પર પોતાની અનોખી સ્ટાઈલથી જાણીતો બનેલો યુટ્યુબર “રોયલ રાજા” ફરી એકવાર કાયદાકીય સકંજામાં ફસાયો છે. ક્રાઈમ બ્રાન્ચની ટીમે બાતમીના આધારે ગુંદાળા ગામે “રોયલ રાજા” ના નિવાસસ્થાને દરોડો પાડતા વિદેશી દારૂ ઝડપાયો છે. જોકે, પોલીસના આગમન સાથે જ આરોપી યુટ્યુબર પોલીસને ચકમો આપીને અંધારાનો લાભ લઈ નાસી છૂટવામાં સફળ રહ્યો છે.

ક્રાઈમ બ્રાન્ચની ટીમને ચોક્કસ બાતમી મળી હતી કે યુટ્યુબર રોયલ રાજાના ઘરે ગેરકાયદેસર રીતે દારૂનો જથ્થો ઉતારવામાં આવ્યો છે. દરોડા દરમિયાન પોલીસે ઘરની જડતી લેતા 249 બોટલ વિદેશી દારૂ મળી આવ્યો હતો. પોલીસે ઘટનાસ્થળેથી રૂ. 2.02 લાખનો દારૂ, મોબાઈલ ફોન અને એક ઇલેક્ટ્રિક બાઇક (ઇ-બાઇક) સહિતનો મુદ્દામાલ કબજે કર્યો છે.

પોલીસની ગાડીઓ ગુંદાળા ગામે પહોંચતા જ યુટ્યુબર “રોયલ રાજા” સતર્ક થઈ ગયો હતો અને પોલીસ પકડમાં આવે તે પહેલા જ તે અદ્રશ્ય થઈ ગયો હતો. ગીર સોમનાથ પોલીસે આ મામલે પ્રોહીબિશન એક્ટ હેઠળ ગુનો દાખલ કર્યો છે. ઉલ્લેખનીય છે કે, આ યુટ્યુબર અગાઉ પણ અનેક વિવાદિત વીડિયો અને પ્રવૃત્તિઓને કારણે ચર્ચામાં રહ્યો છે.

નર્મદા જિલ્લામાં પવિત્ર ‘ઉત્તરવાહિની પંચકોષી નર્મદા પરિક્રમા’નો પ્રારંભ ગત ૧૯મી માર્ચથી થઈ ચૂક્યો છે. આ આસ્થાના પર્વમાં ગુજરાત સહિત મહારાષ્ટ્ર, મધ્યપ્રદેશ અને દેશના અન્ય ખૂણેથી મોટી સંખ્યામાં શ્રદ્ધાળુઓ મા નર્મદાના આશીર્વાદ લેવા ઉમટી રહ્યા છે. યાત્રિકોની સુરક્ષા અને સલામતીને ધ્યાનમાં રાખીને નર્મદા જિલ્લા વહીવટી તંત્ર દ્વારા મહત્ત્વપૂર્ણ ગાઈડલાઈન જાહેર કરવામાં આવી છે.

નર્મદા જિલ્લા મેજિસ્ટ્રેટ દ્વારા ભારતીય નાગરિક સુરક્ષા સંહિતાની જોગવાઈઓ અંતર્ગત એક જાહેરનામું પ્રસિદ્ધ કરવામાં આવ્યું છે, જે મુજબ પરિક્રમાર્થીઓએ નદી પાર કરતી વખતે નીચે મુજબની સૂચનાઓનું ચુસ્તપણે પાલન કરવાનું રહેશે.

સુરક્ષા નિયમો અને દંડની જોગવાઈ

• મુસાફરો માટે: નાવડીમાં બેસનાર દરેક મુસાફરે ફરજિયાતપણે લાઇફ જેકેટ પહેરવાનું રહેશે. જે મુસાફર લાઈફ જેકેટ નહીં પહેરે તેમની પાસેથી વ્યક્તિ દીઠ રૂપિયા 100નો દંડ વસૂલવામાં આવશે.
• ઇજારદારો માટે: જો નાવડીના ઇજારદાર (ઓપરેટર) દ્વારા લાઈફ જેકેટ પૂરા પાડવામાં કે પહેરાવવામાં કોઈ પણ પ્રકારની ચૂક થશે, તો તેમની પાસેથી રૂપિયા 500નો દંડ વસૂલ કરવામાં આવશે.
• જાગૃતિ: આ નિયમો અંગેના જરૂરી બોર્ડ અને બેનરો લગાવવાની જવાબદારી સંબંધિત ઇજારદારે નિભાવવાની રહેશે.
• અમલીકરણ અને જવાબદારી: વહીવટી તંત્રએ આ નિયમોના અમલ માટે અલગ-અલગ વિભાગોને જવાબદારી સોંપી છે:
• પોલીસ વિભાગ: મુસાફરો પાસેથી દંડ વસૂલવાની કામગીરી પોલીસ વિભાગ દ્વારા કરવામાં આવશે.
• માર્ગ અને મકાન વિભાગ (પંચાયત): ઇજારદારો પાસેથી નિયત દંડ વસૂલવાની જવાબદારી કાર્યપાલક ઈજનેરશ્રી, પંચાયત (મા.મ.) વિભાગ, રાજપીપળાની રહેશે.

આ જાહેરનામું 18 એપ્રિલ 2026ના રોજ બપોરે 12:00 કલાક સુધી અમલમાં રહેશે. જો કોઈ પણ વ્યક્તિ આ જાહેરનામાનો ભંગ કરશે, તો તેમની સામે ભારતીય ન્યાય સંહિતા – 2023ની કલમ 223 મુજબ કાયદેસરની શિક્ષાત્મક કાર્યવાહી કરવામાં આવશે.