નડિયાદના માણેક ચોક વિસ્તારમાં પાલિકાની માલિકીની મલાવ તળાવની જમીન પર પાકા દબાણો ખડકી દેવાયા છે. ૧૯૮૧ માં માત્ર ખાણી- પીણીની લારીઓ ઉભી રાખવા માટે અપાયેલી ૧૨૦ ચોરસ ફૂટની જગ્યામાં આજે પાકા બાંધકામો અને પતરાના શેડ ખકદી દેવાયા છે. 

નડિયાદ પાલિકામાં ૨૦૨૨માં સામાન્ય સભામાં ઠરાવ નં. ૬૭ પસાર કરીને તમામ ગેરકાયદે દબાણો દૂર કર પ્રત્યક્ષ કબજો લેવાનો નિર્ણય લેવાયો હતો. પરંતુ અત્યાર સુધીમાં તંત્રએ માત્ર દેખાડા પુરતી જ કામગીરી કરી છે. માણેક ચોકની વિવાદિત જગ્યામાં ભૂતકાળમાં પાલિકાએ ગેરકાયદે શેડ તોડવાની ઝુંબેશ કરી હતી. પરંતુ જમીનનો પ્રત્યક્ષ કબજો લેવાની પણ તસ્દી ક્યારેય લીધી નથી. રેકોર્ડ મુજબ, ૧થી૨૫ નંબરના સ્ટોલ ધારકોને ચોક્કસ શરતોએ જમીન ફાળવાઇ હતી. જેની મુદત પણ પૂર્ણ થઇ ચૂકી છતાં દબાણકારોપાલિકાને જાણ કર્યા વિના જ પાકા બાંધકામો કરી દીધા છે. જયારે મૂળ લાભાર્થીઓ પોતે ધંધો કરવાના બદલે પાલિકાની જમીન અન્ય વેપારીઓને તોતિંગ ભાડા આપી હોવાનું પાણ સામે આવ્યું છે. પાલિકાને એક રૂપિયો પણ ભાડું મળતુ નથી. જયારે અધિકારીઓ માત્ર નોટિસો આપીને સંતોષ માને છે. સંતરામ રોડ પર ડી.પી.દેસાઇના ખાંચાથી સંતરામ ટાવર સુધીના દુકાનદારોએ પોતાની દુકાનની પાછળના ભાગે તળાવની જમીનમાં ગેરકાયદે દબાણો કર્યા છે. તંત્ર દ્વારા ફાયર બ્રિગેડના રસ્તા નડતરરૂપ એક દુકાન તોડીને સંતોષ માન્યો હતો. પરંતુ વગદાર વેપારીઓએ સામે લાલ આંખ કરવામાં અધિકારીઓ પાછી પાની કરી રહ્યાં છે.

પાલિકાની જમીનમાં પેટા ભાડે સ્ટોલ પધરાવાયા

પાલિકાના નિયમો મુજબ ફાળવાયેલી જગ્યા અન્ય કોઈને આપી શકાતી નથી, તેમ છતાં માણેકચોકમાં મોટાભાગના સ્ટોલ અને શેડ અન્ય વેપારીઓને ભાડે આપી દેવાયા છે. મૂળ ફાળવણી ધારકો ઘરે બેઠા હજારો રૂપિયા ભાડું વસૂલે છે, જ્યારે પાલિકાની તિજોરીમાં ફૂટી કોડી પણ આવતી નથી.

46 વર્ષની પાલિકા અને મનપાની બેદરકારીથી દબાણો યથાવત્

વર્ષ ૧૯૮૧ માં લાયસન્સ ફીથી અપાયેલી જગ્યાઓ આજે સૌથી મોટા બજાર જેવું સ્વરૂપ ધારણ કરી ચુકી છે. છેલ્લા ૪૬ વર્ષમાં અનેક બોર્ડ બદલાયા અને અનેક અધિકારીઓ આવ્યા, પણ માણેકચોકનું દબાણ હટાવવાની કોઈએ તસ્દી લીધી નથી. ૨૦૧૦ માં અપાયેલી નોટિસોનો કચરાપેટીમાં નિકાલ કરી દેવાયો હતો, અને હવે ૨૦૨૨ ના ઠરાવની સ્થિતિ પણ તેના જેવી જ થતી જોવા મળી રહી છે. ત્યારે ઉચ્ચાધિકારીઓ હજુ પણ મૌન સેવીને બેસી રહેશે, તે અંગે ચર્ચાઓ ઉઠી છે.

અત્યારે સ્થાનિક સ્વરાજ્યની ચૂંટણીઓ આવી  રહી હોવાથી સરકાર દ્વારા થોકબંધ વિકાસકાર્યોના લોકાર્પણ અને ખાતમૂહુર્તનો ધમધમાટ ચાલુ છે. જેમાં ગુજરાત રાજ્ય માર્ગ વાહન વ્યવહાર નિગમ દ્વારા નવી બસોનું લોકાર્પણ પણ કરવામાં આવી રહ્યું છે. પરંતુ આ લોકાર્પણ કાર્યક્રમોમાં જનતાના પ્રતિનિધિઓ જ કાયદાનું પાલન કરવાનું ભૂલી ગયા હોય તેવા દ્રશ્યો સામે આવ્યા છે. જેતપુરના ભાજપના ધારાસભ્ય જયેશ રાદડિયા અને સોમનાથના કોંગ્રેસના ધારાસભ્ય વિમલ ચુડાસમાએ નવી બસોને લીલી ઝંડી આપ્યા બાદ પોતે સ્ટીયરીંગ સંભાળ્યું હતું, પરંતુ આ દરમિયાન તેઓએ સીટબેલ્ટ ન બાંધીને ટ્રાફિક નિયમોનું સરેઆમ ઉલ્લંઘન કરતા ઉહાપોહ મચી ગયો છે.જેતપુર ખાતે નવી એસ.ટી. બસોના લોકાર્પણ પ્રસંગે પૂર્વ મંત્રી અને ધારાસભ્ય જયેશ રાદડિયા ઉપસ્થિત રહ્યા હતા. ઉત્સાહમાં આવીને તેઓ પોતે ડ્રાયવિંગ સીટ પર બેસી ગયા હતા અને બસ ચલાવી હતી. જેનો વીડિયો બે દિવસથી વાયરલ થઈ રહ્યો છે. જેમાં સ્પષ્ટ જોઈ શકાય છે કે તેમણે સીટબેલ્ટ પહેર્યો નહોતો. એક જવાબદાર નેતા તરીકે ટ્રાફિકના પાયાના નિયમની અવગણના ચર્ચાનો વિષય બની છે. આવી જ ઘટના સોમનાથમાં પણ જોવા મળી હતી. ગીર સોમનાથના કોંગ્રેસના ધારાસભ્ય વિમલ ચુડાસમાએ પણ નવી બસના લોકાર્પણ સમયે ડ્રાયવિંગ સીટ સંભાળી હતી. તેમણે પણ સીટબેલ્ટ વગર જ બસ હંકારી હતી. સોશિયલ મીડિયામાં આ બંને નેતાઓના વીડિયો વાયરલ થયા બાદ લોકો સવાલ ઉઠાવી રહ્યા છે કે, ‘શું નિયમો માત્ર સામાન્ય જનતા માટે જ છે?’ 

અહીં સૌથી મોટો અને ગંભીર સવાલ એ ઊભો થાય છે કે, શું ધારાસભ્ય પાસે પબ્લિક ટ્રાન્સપોર્ટની હેવી બસ ચલાવવાનું કાયદેસરનું લાયસન્સ છે? મોટર વ્હીકલ એક્ટ મુજબ કોઈપણ હેવી કોમશયલ વાહન ચલાવવા માટે ખાસ પ્રકારના લાયસન્સ અને ટ્રેનિંગની જરૂર હોય છે. જો કોઈ સામાન્ય નાગરિક લાયસન્સ વિના કે ટૂ-વ્હીલર પર હેલ્મેટ વિના પકડાય તો પોલીસ અને આરટીઓ તેને આકરો દંડ ફટકારે છે, કાયદાનો પાઠ ભણાવે છે. પરંતુ જ્યારે એક ચૂંટાયેલા જનપ્રતિનિધિ, જેઓ ખુદ કાયદાના ઘડવૈયા ગણાય છે, તે જ કાયદાનું સરેઆમ ઉલ્લંઘન કરે ત્યારે આ તંત્ર કેમ આંખ આડા કાન કરે છે?ટ્રાફિક નિયમનનો દંડ ફક્ત આમજનતા ભરે ? લોકરોષ

સામાન્ય નાગરિક જો ટ્રાફિક સિગ્નલ પર દોરેલા પટ્ટાથી થોડું જ આગળ વાહન ઉભું રાખે તો પણ રૂા.૫૦૦ દંડ ફટકારી દેવામાં આવે છે. જ્યારે અન્ય ટ્રાફિક દંડની તો વાત જ સામાન્ય વર્ગના વાહનચાલકોને ફફડાવી દે છે. પરંતુ હવે જેતપુર અને સોમનાથના બંને ધારાસભ્યોએ જ સીટબેલ્ટ વગર એસ.ટી. બસ ચલાવી છે તો ટ્રાફિક પોલીસ મેમો ફાડશે ? પોલીસ કોઈ કાર્યવાહી કરશે કે કેમ તે મોટો પ્રશ્ન છે.

અમરેલી જિલ્લામાં વિવિધ ચીજવસ્તુને ચળકતી કરવાના કેમિકલ વેચવાના બહાને ગામડાઓમાં જઈ મહિલાની સાથે વાતચીત કરીને લીંબુ પાણીના નામે કેમિકલ જીભ પર મુકાવી ચાખવાનું કહી બેભાન જેવા બનાવીને સોનાના દાગીનાની ચીલઝડપ કરીને ભાગી જતાં બિહારના બે શખ્સોને અમરેલી જિલ્લા એલસીબીએ પકડી પાડી મુદ્દામાલ કબજે લીધો છે.

અગાઉ બનેલા બનાવની વિગત એવી છે કે ધારી તાલુકાના ત્રંબકપુર ગામે વિવિધ લિકવીડ કેમિકલ વેચવાના બહાને બાઈક પર બેસીને બિહારના મહમદ શમશેર મહમદ ઇઝહાર શેખ અને તેનો જોડીદાર મહમદ ઝીયા ઉલ મહમદ ગફુર ગયા હતા. આ બન્ને શખ્સોએ વિજ્યાબેન ટાંકના ઘરે જઈ સોના ચાંદીના દાગીના ચમકાવી દેવા અને વાસણને નવા જેવા ચમકતા કરી દેવા માટે કામ કરીએ છીએ એમ કહીને એના ઘરમાં રહેલો કળશો માગી ચમકાવી દીધો હતો. એ પછી એક પીળા કલરનું લિકવીડ કાઢીને આ લીંબું પાણી છે એમ કહીને ચાખવા આપતા વિજયાબેનને ચાખવા આપતા જ તેને જીભમાં સ્હેજ બળતરા થવા લાગી હતી. બાદમાં ચકકર આવવા લાગતા એ જ વખતે આ બન્નેએ વિજયાબેને પહેરેલો સોનાનો ચેઈનની ચીલઝડપ કરીને નાસી છુટયા હતા.

ગુજરાતમાં છેલ્લા કેટલાક દિવસોથી એક એવી ઘટનાએ જોર પકડ્યું છે જેણે રાજ્યની કાયદો અને વ્યવસ્થા તેમજ રાજકીય દખલગીરી સામે અનેક ગંભીર સવાલો ઊભા કર્યા છે. એક તરફ રાજ્યના ગૃહમંત્રી હર્ષ સંઘવી લુખ્ખા તત્વોને જાહેરમાં પાઠ ભણાવવાની વાત કરે છે, તો બીજી તરફ શાસક પક્ષના જ ધારાસભ્યના દબાણ હેઠળ પોલીસકર્મીઓને સસ્પેન્ડ કરવામાં આવે છે. આ વિરોધાભાસે જનતામાં ભારે રોષ અને ચર્ચા જગાડી છે.

ઘટનાક્રમ: જ્યારે લુખ્ખાઓએ કાયદો હાથમાં લીધો
તાજેતરમાં રાજ્યમાં એક અત્યંત શરમજનક ઘટના બની હતી, જેમાં લુખ્ખા તત્વોએ પોલીસને જાહેરમાં દોડાવી હતી. ખાખી વર્દીધારી પોલીસકર્મીઓ જ્યારે અસામાજિક તત્વો સામે લાચાર દેખાયા, ત્યારે સોશિયલ મીડિયા પર તેના વીડિયો વાયરલ થતા જ પોલીસ બેડાની આબરૂના ધજાગરા ઊડ્યા હતા. આ ઘટના બાદ રાજ્યના ગૃહમંત્રી હર્ષ સંઘવીએ કડક વલણ અપનાવ્યું હતું. તેમણે સ્પષ્ટ સંકેત આપ્યા હતા કે, “જે લુખ્ખાઓએ પોલીસને દોડાવી છે, તેમનો એ જ સ્થળે જાહેરમાં વરઘોડો કાઢવામાં આવશે.”
ગૃહમંત્રીના આદેશ અને જનતાની માંગને માન આપી પોલીસ એક્શનમાં આવી હતી. પોલીસે તે લુખ્ખા તત્વોને પકડીને ઘટના સ્થળે લઈ જઈ તેમનો જાહેરમાં વરઘોડો કાઢ્યો હતો. આ કાર્યવાહીથી સામાન્ય નાગરિકોમાં એવો સંદેશ ગયો હતો કે કાયદાનો ડર હજુ જીવિત છે અને પોલીસનું મનોબળ મજબૂત છે.
ધારાસભ્યની એન્ટ્રી: કાયદો મોટો કે લોકપ્રતિનિધિ?
પરંતુ આ આખી ઘટનામાં વળાંક ત્યારે આવ્યો જ્યારે ધારાસભ્ય અલ્પેશ ઠાકોરે આ મામલે મધ્યસ્થી કરી. ધારાસભ્યએ ઉચ્ચ પોલીસ અધિકારીઓને ઉગ્ર રજૂઆત કરી કે પોલીસની આ રીતે જાહેરમાં વરઘોડો કાઢવાની પદ્ધતિ યોગ્ય નથી. નવાઈની વાત તો એ છે કે, જે પોલીસે ગુનેગારોને ડામવા અને પોતાની આબરૂ બચાવવા પગલાં ભર્યા હતા, તે જ પોલીસકર્મીઓને ઉચ્ચ સ્તરેથી દબાણ આવતા સસ્પેન્ડ કરી દેવામાં આવ્યા!
આ સસ્પેન્શન બાદ જનતામાં અનેક સવાલો ઉઠી રહ્યા છે:

• કાયદાથી ઉપર કોણ? શું રાજ્યમાં ધારાસભ્યનું પદ કાયદાની પ્રક્રિયા અને ગૃહમંત્રીના આદેશો કરતાં પણ ઊંચું છે?
• પોલીસનું મનોબળ કોણ તોડે છે? એક તરફ સરકાર પોલીસને ફ્રી હેન્ડ આપવાની વાતો કરે છે, તો બીજી તરફ નેતાઓની રજૂઆતથી પોલીસને જ સસ્પેન્ડ કરાય છે.
• ગુનેગારોની વકીલાત કેમ? શું નેતાઓ પોતાની વોટબેંક સાચવવા માટે અસામાજિક તત્વોની તરફેણ કરી રહ્યા છે?
  પોલીસની લાચારી અને રાજ્યની સુરક્ષા
  જ્યારે પણ કોઈ પોલીસ અધિકારી નિષ્ઠાપૂર્વક કામ કરવાનો પ્રયત્ન કરે છે, ત્યારે નેતાઓની આવી દખલગીરી તેમને માનસિક રીતે તોડી નાખે છે. જો પોલીસ અધિકારીઓ રાજકીય દબાણ હેઠળ કામ કરશે, તો ભવિષ્યમાં કોઈ પણ પોલીસવાળો ગુંડાઓ પર હાથ નાખતા પહેલા સો વાર વિચારશે. આનાથી ગુનેગારો બેફામ બનશે અને સામાન્ય માણસની સુરક્ષા જોખમમાં મુકાશે.
  ગૃહમંત્રી અને ઉપમુખ્યમંત્રી જેવા ઉચ્ચ હોદ્દાઓ પર બેઠેલા નેતાઓની સૂચનાઓને પણ જો એક ધારાસભ્યની રજૂઆત ઘોળીને પી જતી હોય, તો રાજ્યમાં કાયદાનું શાસન છે કે ‘વગદારો’નું? તે મોટો સવાલ છે.
  નિષ્કર્ષ: જનતાનો આક્રોશ
  ‘પાક્કો ગુજરાત’ જનતા વતી પૂછે છે કે, પોલીસને અપમાનિત કરી નેતાઓ શું સાબિત કરવા માંગે છે? જો લુખ્ખાઓ પોલીસને દોડાવશે અને નેતાઓ પોલીસને સસ્પેન્ડ કરાવશે, તો રક્ષણ કોણ કરશે? હવે સમય આવી ગયો છે કે સરકાર નક્કી કરે કે તેને ‘ખાખીનું સન્માન’ જાળવવું છે કે ‘નેતાઓના અહંકાર’ને પોષવો છે.
  રિપોર્ટ: પાક્કો ગુજરાત ટીમ

 સુરેન્દ્રનગરના ગણપતિ ફાટસર વિસ્તારમાં છેલ્લા લાંબા સમયથી રોડ, ભૂગર્ભ ગટર અને ડ્રેનેજની સુવિધાના અભાવે સ્થાનિકો હાલાકી ભોગવી રહ્યા છે. ખરાબ રસ્તા અને ઉભરાતી ગટરોને કારણે દર્શનાર્થીઓને ગંદા પાણીમાંથી પસાર થવું પડે છે. 

વિસ્તારમાં અનેક જગ્યાએ ગટર લાઈનો તૂટેલી હોવાથી રસ્તા પર દૂષિત પાણી ફરી વળવાની સમસ્યા કાયમી બની છે. જેના કારણે મચ્છરજન્ય રોગચાળો ફાટી નીકળવાની ભીતિ સેવાઈ રહી છે. સ્થાનિક રહીશો દ્વારા આ બાબતે સુરેન્દ્રનગર મહાનગરપાલિકાના કમિશનરને લેખિતમાં રજૂઆત કરવામાં આવી છે.રજૂઆતમાં જણાવ્યા મુજબ, નવા બનેલા રોડ પણ ટૂંકા સમયમાં તૂટી ગયા છે. સ્થાનિકોએ માંગ કરી છે કે તાત્કાલિક ધોરણે ડ્રેનેજ લાઈનનું સમારકામ કરવામાં આવે અને નવા રોડ રસ્તા બનાવવામાં આવે. આ ઉપરાંત, નબળી ગુણવત્તાનું કામ કરનાર કોન્ટ્રાક્ટર એજન્સી સામે કડક પગલાં લેવાની પણ માંગણી કરવામાં આવી છે. જો આગામી દિવસોમાં આ પ્રાથમિક પ્રશ્નોનું નિરાકરણ નહીં આવે, તો રહીશોએ ઉગ્ર આંદોલન કરવાની ચીમકી ઉચ્ચારી છે, જેની સંપૂર્ણ જવાબદારી પાલિકા તંત્રની રહેશે તેવું સ્પષ્ટ જણાવ્યું છે.

અમરેલી જિલ્લામાં લૂંટ વીથ મર્ડર જેવા ગંભીર ગુના આચરી નાસી જતી ટોળકીને દામનગર પોલીસે પકડી પાડી હત્યા અને ચાંદીના કડાની લૂંટ સહિત કુલ પાંચ ગુનાઓ અને કેબલ ચોરી, મોટર ચોરી જેવા ગુનાઓ ઉકેલ્યા છે.

દામનગરમાં જ રહેતા અને આ જ તાલુકામાં ગંભીર ગુનાઓ આચરીને નાસી જતાં અર્જુન ગોરધન નાવડિયા, હાર્દિક ઉર્ફે બાવલો ગોરધન નાવડિયા અને કિશન ભૂપત પરમારને દામનગરના પોલીસ ઈન્સપેકટર સી.એન.દવે અને સ્ટાફે પકડી પાડી લાલ આંખ કરતા જ આ શખ્સો પોપટ બની ગયા હતા.

આ શખ્સોની કબૂલાત મુજબ આ શખ્સોએ નીર ઉર્ફે બોડો વિનુ પરમાર, સાહિલ ઉર્ફ પાપુડો વિનુ પરમાર વિગેરે મળી દામનગર નજીક હજીરા ધાર વિસ્તારમાં દાનાભાઈ ધનાભાઈ કામનીયા નામના માલધારી ચેકડેમ પાસે ઢોર ચરાવી રહ્યા હતા ત્યારે આ શખ્સોએ માલધારી વૃદ્ધે પહેરેલા કાંડામાં ચાંદીના કડાની લૂંટ કરવા દાનાભાઈને પકડીને બાજુમાં આવેલા ખાડામાં પાણીમાં નાખી દઈ ડૂબાડી દઈને ચાંદીના કડાની લૂટ ચલાવી નાસી ગયા હતા. આ ઉપરાંત દામનગરના એક અન્ય માલધારીને આ જ મોડસ ઓપરેન્ડીથી ચાંદીના કડાની લૂંટ ચલાવી હતી. આ ઉપરાંત સીમ વિસ્તારમાં કેબલ ચોરી, મોટર ચોરી સહિતના ગુનાઆની કબૂલાત આપી હતી.