ભારતને સેમિકન્ડક્ટર ક્ષેત્રે આત્મનિર્ભર બનાવવાના લક્ષ્ય સાથે આગામી 28 ફેબ્રુઆરી 2026ના રોજ વડાપ્રધાન નરેન્દ્ર મોદી સાણંદ ખાતે માઇક્રોન ટેક્નોલોજીના અત્યાધુનિક ATMP (એસેમ્બલી, ટેસ્ટિંગ, માર્કિંગ અને પેકેજિંગ) પ્લાન્ટનું ઉદ્ઘાટન કરશે. માઇક્રોન સેમિકન્ડક્ટર ટેક્નોલોજી ઇન્ડિયા પ્રા. લિમિટેડ દ્વારા સાણંદમાં ₹22,516 કરોડનું જંગી રોકાણ કરવામાં આવ્યું છે, જે ભારતીય ટેકનોલોજી ક્ષેત્રે નવી ક્રાંતિ લાવશે તેવું માનવામાં આવે છે.

આ પ્લાન્ટમાં સોલિડ સ્ટેટ ડ્રાઇવ (SSD) જેવા સ્ટોરેજ ઉપકરણો તેમજ DRAM અને NAND પ્રકારના મેમરી ઉત્પાદનો તૈયાર કરવામાં આવશે. હાલમાં આ પ્લાન્ટમાં 2000 લોકોની ટીમ કાર્યરત છે, જે આગામી સમયમાં વધીને 5000 થશે. નોંધનીય છે કે, આ ટીમમાં દિવ્યાંગ નાગરિકોને પણ ઓપરેટર અને ટેક્નિશિયન તરીકે રોજગારી આપીને સમાવેશ કરવામાં આવ્યો છે.

આ પ્લાન્ટમાં થતી કામગીરી ટેકનિકલ દ્રષ્ટિએ અત્યંત જટિલ અને મહત્વપૂર્ણ છે. સેમિકન્ડક્ટર ચિપ બનાવવાની પ્રક્રિયા રેતીમાંથી શુદ્ધ સિલિકોન અલગ કરવાથી શરૂ થાય છે, જેને ઓગાળીને સિલિન્ડર (ઇનગોટ) બનાવાય છે અને ત્યારબાદ તેના બારીક ટુકડા કરીને ‘વેફર્સ’ તૈયાર કરવામાં આવે છે. ફેબ્રિકેશન પ્લાન્ટમાં આ વેફર્સ પર ફોટોલિથોગ્રાફી દ્વારા ઇલેક્ટ્રિક પેટર્ન અને ટ્રાન્ઝિસ્ટર્સ કંડારીને મેમરી તૈયાર કરવામાં આવે છે. ત્યારબાદ આ વેફર્સ સાણંદના ATMP પ્લાન્ટમાં પહોંચે છે, જ્યાં તેની એસેમ્બલી, સ્પીડ અને મેમરીનું સચોટ ટેસ્ટિંગ, માર્કિંગ અને અંતે પેકેજિંગ કરવામાં આવે છે.

માઇક્રોનના CEO સંજય મેહરોત્રાના જણાવ્યા અનુસાર, આર્ટિફિશિયલ ઇન્ટેલિજન્સ (AI) ના યુગમાં ડેટા પ્રોસેસિંગ માટે અદ્યતન મેમરી અને સ્ટોરેજ અનિવાર્ય છે. સાણંદમાં બનતી આ ચીપ્સ વૈશ્વિક સ્તરે AI ટેક્નોલોજીની માગ પૂરી કરવામાં મદદરૂપ થશે.

જૂનાગઢમાં સોશિયલ મીડિયા ફેમ કીર્તિ પટેલ અને પોલીસ વચ્ચેના વિવાદે નવો વળાંક લીધો છે. પ્રસિદ્ધ ભવનાથ ક્ષેત્રમાં શિવરાત્રીના મેળા દરમિયાન મહિલા પોલીસ અધિકારી સાથે ગેરવર્તન કરવાનો મામલો ગરમાયો છે.

જૂનાગઢના પ્રસિદ્ધ ભવનાથ ક્ષેત્રમાં શિવરાત્રીના મેળા દરમિયાન મહિલા પોલીસ અધિકારી સાથે ગેરવર્તન કરવાનો મામલો ગરમાયો છે. આ ઘટનામાં આરોપી સોશિયલ મીડિયા ઈન્ફ્લુએન્ઝર કીર્તિ પટેલ આજે પોતાના વકીલ સાથે જૂનાગઢ તાલુકા પોલીસ સ્ટેશનમાં હાજર થઈ છે. મહિલા પોલીસ ઈન્સ્પેક્ટર (PI) ની ફરજમાં રુકાવટ અને ગેરવર્તન કરવા બદલ તેની સામે કાયદેસરની ફરિયાદ નોંધાઈ હતી.

મહાશિવરાત્રીના પવિત્ર પર્વ નિમિત્તે જૂનાગઢના ભવનાથ તળેટીમાં આવેલા મૃગી કુંડમાં સ્નાન કર્યા બાદ કીર્તિ પટેલ અને ત્યાં ફરજ પર તૈનાત મહિલા પી.આઈ. વચ્ચે કોઈ બાબતે બોલાચાલી થઈ હતી. આરોપ છે કે કીર્તિ પટેલે પોલીસ અધિકારી સાથે ઉદ્ધત વર્તન કર્યું હતું અને તેમની સરકારી ફરજમાં અડચણ ઊભી કરી હતી. આ ઘટનાનો વીડિયો પણ સોશિયલ મીડિયા પર વાયરલ થયો હતો, ત્યારબાદ પોલીસે ગુનો નોંધી તપાસ હાથ ધરી હતી.

આજે કીર્તિ પટેલ કાયદાકીય સલાહકાર સાથે પોલીસ મથકે પહોંચતા જ જૂનાગઢ તાલુકા પોલીસે તેની અટકાયત કરી પૂછપરછ શરૂ કરી છે. હાલમાં પોલીસ દ્વારા તેનું સત્તાવાર નિવેદન લેવાની પ્રક્રિયા ચાલી રહી છે. પોલીસ સૂત્રોના જણાવ્યા અનુસાર, કાયદાનું ઉલ્લંઘન કરનાર સામે કડક પગલાં લેવામાં આવશે. આ કેસની તપાસ હાલ ચાલુ છે અને ટૂંક સમયમાં વધુ ખુલાસા થઈ શકે છે.

ગુજરાત ATSએ પંજાબના એક ચકચારી ડ્રગ્સ અને હથિયાર તસ્કરીના કેસમાં વોન્ટેડ આરોપીને અમદાવાદના હૃદય સમાન ગીચ વિસ્તારમાંથી ઝડપી પાડ્યો છે. આંતરરાષ્ટ્રીય સરહદેથી આવતા નશીલા પદાર્થો અને વિસ્ફોટકોના નેટવર્ક સાથે જોડાયેલો આ આરોપી, પોલીસની ધરપકડથી બચવા માટે દેશના અલગ-અલગ રાજ્યો અને નેપાળમાં આશરો લીધા બાદ અંતે ગુજરાતમાં છુપાયો હતો. સુરક્ષા એજન્સીઓના આ સફળ ઓપરેશને ફરી એકવાર સાબિત કર્યું છે કે રાષ્ટ્રીય સુરક્ષા માટે જોખમી એવા તત્વો ગમે તેટલા વેશ પલટો કરે, પણ કાયદાના હાથથી બચી શકતા નથી.

ગુજરાત ATSના DySP હર્ષ ઉપાધ્યાયને બાતમી મળી હતી કે, પંજાબના અમૃતસર જિલ્લાના રાજાસાસી પોલીસ સ્ટેશનના હેરોઇન અને ગ્રેનેટ પિસ્તોલ સ્મગલિંગ કેસનો વોન્ટેડ આરોપી રહેમત અલી શેખ પંજાબથી ભાગીને બિહાર થઈને અમદાવાદમાં આવ્યો છે. જેના આધારે તપાસ કરીને ATSએ રખિયાલ ખાતેથી રહેમત અલી શેખની એમ્બ્રોડરીના કારખાનામાંથી ધરપકડ કરી હતી.

આરોપીની પૂછપરછ દરમિયાન જાણવા મળ્યું હતું કે, રહેમત અલી મોટા નારકોટિક્સ અને ગ્રેનેડ પિસ્તોલ નેટવર્કનો એક ભાગ છે. આરોપીએ જાન્યુઆરીમાં હેરોઇન તેમજ હેન્ડ ગ્રેનેટેડ અને પિસ્તોલના કન્સાઇનમેન્ટ પાકિસ્તાનની પંજાબ બોર્ડરથી લઈને પંજાબના અન્ય વ્યક્તિઓને આપ્યા હતા. જે અંગે અમૃતસર જિલ્લાના રાજા સાસી પોલીસ સ્ટેશનમાં ગુનો નોંધવામાં આવ્યો હતો. આ ગુનામાં પોલીસે અગાઉ બે આરોપીઓની ધરપકડ કરી હતી. જેમની પાસેથી 42 કિલો હેરોઇન, ચાર હેન્ડ ગ્રેનેડ, એક સ્ટાર માર્ક પિસ્તોલ અને 46 કારતૂસ મળી આવ્યા હતા.

બે આરોપી પકડાતા રહેમત અલી પંજાબથી નાસી ગયો હતો. આરોપી પંજાબથી ભાગીને નેપાળમાં જતો રહ્યો હતો. ત્યારબાદ બિહાર થઈ ગુજરાતના અમદાવાદમાં આવ્યો હતો. આરોપી છેલ્લા કેટલાક સમયથી રખિયાલ વિસ્તારમાં રોકાયો હતો. રખિયાલના એમ્બ્રોડરીના કારખાનામાં કામ કરવા માટે આવ્યો હોવાથી આરોપી રખિયાલના કારખાનામાં જ રોકાયો હતો. ATS દ્વારા આરોપીની કોણે મદદ કરી છે તે તપાસ કરવામાં આવી રહી છે. આ ઉપરાંત આરોપીને પંજાબ પોલીસને સોંપવા માટેની પણ તજવીજ હાથ ધરી છે.

સમગ્ર દેશમાં સ્વચ્છતા અભિયાન ચાલી રહ્યું છે. ક્લીન ઈન્ડિયા અભિયાન હેઠળ સરકાર દ્વારા દેશને સ્વચ્છ રાખવા માટે અનેક પહેલ કરવામાં આવી છે. આ માટે શહેરોને સ્વચ્છતાનો એવોર્ડ પણ આપવામાં આવે છે.સમગ્ર દેશમાં સ્વચ્છતા અભિયાન ચાલી રહ્યું છે. ક્લીન ઈન્ડિયા અભિયાન હેઠળ સરકાર દ્વારા દેશને સ્વચ્છ રાખવા માટે અનેક પહેલ કરવામાં આવી છે.આ માટે શહેરોને સ્વચ્છતાનો એવોર્ડ પણ આપવામાં આવે છે. ત્યારે ગુજરાતમાં પણ સ્વચ્છતા અંગે સરકાર દ્વારા અનેક પ્રયાસો હાથ ધરાયા હોવાના દાવા કરવામાં આવે છે. રાજ્યમાં સ્વચ્છતા અભિયાનની વાતો વચ્ચે શાળાઓમાં ફાળવતી સ્વચ્છતાની ગ્રાન્ટ અંગે કંઈક જુદી હકીકત સામે આવી છે.

ગુજરાતની સ્કૂલોમાં ફાળવવામાં આવતી સ્વચ્છતાની ગ્રાન્ટ અંગે વિધાનસભામાં સરકારે ધારાસભ્યના સવાલનો જવાબ આપ્યો હતો. ગુજરાતની શાળામાં સ્વચ્છતા માટે ગ્રાન્ટની રકમ સાવ સામાન્ય હોવાની વિગતો સામે આવી છે. રાજ્યમાં 100 વિદ્યાર્થીઓ ધરાવતી શાળા માટે માત્ર એક હજાર, 300 વિદ્યાર્થીઓ ધરાવતી શાળા માટે 1800, 500 વિદ્યાર્થી ધરાવતી શાળા માટે 4 હજાર, 501થી વધુ વિદ્યાર્થી ધરાવતી શાળામાં 5 હજારની ગ્રાન્ટ સરકાર તરફથી ફાળવવામાં આવે છે. શિક્ષણ વિભાગ શાળા દીઠ પ્રતિ માસ ગ્રાન્ટ ફાળવે છે.

દિયોદરમાં આંગણવાડી કાર્યકરોનો અનોખો વિરોધ કરવામાં આવી રહ્યો છે. 4 દિવસથી ચાલતા આંદોલન દરમિયાન તાલુકા પંચાયત કચેરીમાં ગરબા રમી સરકાર પાસે માંગણીઓ કરી છે.પોતાની વિવિધ પડતર માંગણીઓને લઈને સમગ્ર રાજ્યમાં આંગણવાડી કાર્યકરો આંદોલન ચલાવી રહ્યા છે, ત્યારે બનાસકાંઠા જિલ્લાના દિયોદર તાલુકા મથકે આંગણવાડી કાર્યકર અને તેડાગર બહેનોએ વિરોધ પ્રદર્શનનું અનોખું સ્વરૂપ અપનાવ્યું છે. છેલ્લા ચાર દિવસથી ચાલી રહેલા આ આંદોલનમાં આજે બહેનોએ તાલુકા પંચાયત કચેરીના પ્રાંગણમાં ગરબા રમીને સરકાર સામે આક્રોશ વ્યક્ત કર્યો હતો.

દિયોદર તાલુકા પંચાયત કચેરી ખાતે મોટી સંખ્યામાં એકઠી થયેલી આંગણવાડી કાર્યકર મહિલાઓએ આજે ચોથા દિવસે પણ પોતાની લડત ચાલુ રાખી હતી. સૂત્રોચ્ચાર અને ધરણાંની સાથે સાથે આજે બહેનોએ કચેરીના પ્રાંગણમાં જ રાસ-ગરબાની રમઝટ બોલાવી હતી. કાર્યકરોનું કહેવું છે કે, સરકાર સુધી તેમનો અવાજ પહોંચાડવા અને ઊંઘતી સરકારને જગાડવા માટે તેમણે આ અનોખો માર્ગ અપનાવ્યો છે.