જમ્મુ અને કાશ્મીરના કિશ્તવાડ જિલ્લામાં સુરક્ષા દળોએ આતંકવાદ સામે મોટી કાર્યવાહી કરી છે. ચતરુ જંગલ વિસ્તારમાં થયેલા એન્કાઉન્ટરમાં જૈશના બે આતંકવાદીઓને ઠાર મારવામાં આવ્યા છે.જમ્મુ અને કાશ્મીરના કિશ્તવાડ જિલ્લોમાં સુરક્ષા દળોને મહત્વપૂર્ણ સફળતા મળી છે. જિલ્લાના દૂરવર્તી અને કઠિન ભૂગોળ ધરાવતા ચતરુ જંગલ વિસ્તારમાં રવિવારે સુરક્ષા દળો અને આતંકવાદીઓ વચ્ચે ભારે એન્કાઉન્ટર થયું. આ કાર્યવાહીમાં પ્રતિબંધિત આતંકી સંગઠન જૈશ-એ-મોહમ્મદના બે આતંકવાદીઓને ઠાર મારવામાં આવ્યા છે.

અધિકારીઓના જણાવ્યા અનુસાર, આતંકવાદીઓની હાજરી અંગે મળેલી ચોક્કસ ગુપ્ત માહિતીના આધારે ભારતીય સેના, જમ્મુ અને કાશ્મીર પોલીસ તથા CRPFની સંયુક્ત ટીમે સર્ચ ઓપરેશન શરૂ કર્યું હતું. ઓપરેશન દરમિયાન આતંકવાદીઓએ ગોળીબાર શરૂ કરતાં એન્કાઉન્ટર ભડકી ઊઠ્યું. લાંબા સમય સુધી ચાલેલા ગોળીબારમાં સુરક્ષા દળોએ બે આતંકવાદીઓને ઠાર કર્યા.

સુરક્ષા એજન્સીઓનું કહેવું છે કે વિસ્તારને સંપૂર્ણ રીતે ઘેરી લેવામાં આવ્યો છે અને કોઈ અન્ય આતંકવાદી છુપાયેલો તો નથી ને, તે માટે સઘન સર્ચ ઓપરેશન હજુ પણ ચાલુ છે. એન્કાઉન્ટર બાદ વિસ્તારમાં વધુ દળો તૈનાત કરવામાં આવ્યા છે અને પરિસ્થિતિ પર સતત નજર રાખવામાં આવી રહી છે.

ઉલ્લેખનીય છે કે ચતરુ જંગલ વિસ્તાર છેલ્લા કેટલાક સમયથી આતંકવાદી ગતિવિધિઓ માટે સંવેદનશીલ માનવામાં આવે છે. ગયા મહિને પણ આ જ વિસ્તારમાં સુરક્ષા દળો અને આતંકવાદીઓ વચ્ચે અનેક વખત ગોળીબાર થયો હતો. તે સમયે એક બહાદુર સૈનિક શહીદ થયો હતો, જ્યારે એક આતંકવાદી માર્યો ગયો હતો. આ ઘટનાઓ બાદથી સુરક્ષા દળોએ વિસ્તારમાં પોતાની ચોકસાઈ અને પેટ્રોલિંગ વધારી હતી. વ્હાઇટ નાઈટ કોર્પ્સ દ્વારા જારી કરાયેલા નિવેદનમાં જણાવાયું છે કે આ સંયુક્ત કાર્યવાહી આતંકવાદની કમર તોડવા માટે મહત્વપૂર્ણ છે. સૈનિકો અને સુરક્ષા કર્મીઓએ વિસ્તારને કાબૂમાં રાખ્યો છે અને સામાન્ય નાગરિકોની સુરક્ષા સર્વોચ્ચ પ્રાથમિકતા છે.

આ એન્કાઉન્ટરથી સ્પષ્ટ થાય છે કે સુરક્ષા દળો આતંકવાદ સામે કડક વલણ અપનાવી રહ્યા છે અને કિશ્તવાડ જેવા દુર્ગમ વિસ્તારોમાં પણ આતંકવાદીઓને કોઈ પણ રીતે છૂટ આપવામાં આવશે નહીં. આવનારા દિવસોમાં પણ આવા ઓપરેશનો ચાલુ રહેવાની શક્યતા છે.

દિલ્હીથી મેરઠ વચ્ચેનું અંતર હવે સમયની દૃષ્ટિએ ઘણું નજીક આવ્યું છે. ‘નમો ભારત રેપિડ રેલ’ શરૂ થતાં મુસાફરોને ઝડપી, સુરક્ષિત અને આધુનિક પ્રવાસનો અનુભવ મળશે. PM નરેન્દ્ર મોદી દ્વારા આજે 82 કિલોમીટર લાંબા દિલ્હી–મેરઠ રિજનલ રેપિડ ટ્રાન્ઝિટ સિસ્ટમ (RRTS)ના બાકીના તમામ ભાગોનું ઉદ્ઘાટન કર્યું છે. આ ઐતિહાસિક પગલાંથી દિલ્હી થી મેરઠ વચ્ચેની મુસાફરી હવે માત્ર 55 મિનિટમાં પૂર્ણ થશે, જે પહેલાં ઘણો સમય લેતી હતી.

આ પ્રોજેક્ટમાં દિલ્હીના સરાય કાલે ખાનથી ન્યૂ અશોક નગર સુધીનો 5 કિમીનો વિભાગ અને મેરઠ દક્ષિણથી મોદીપુરમ સુધીનો 21 કિમીનો વિભાગ સામેલ છે. સાથે જ 23 કિલોમીટર લાંબી મેરઠ મેટ્રોનું પણ ઉદ્ઘાટન કરવામાં આવ્યું, જે દેશની સૌથી ઝડપી મેટ્રો સેવાઓમાંની એક છે. ઉદ્ઘાટન બાદ આજે સાંજે 6 વાગ્યાથી આ બંને સેવાઓ સામાન્ય જનતા માટે શરૂ કરવામાં આવી.

પ્રધાનમંત્રીનું સ્વાગત ગાઝિયાબાદ સ્થિત હિંડોન એરપોર્ટ પર ઉત્તર પ્રદેશના મુખ્યમંત્રી યોગી આદિત્યનાથ દ્વારા કરવામાં આવ્યું. ત્યારબાદ બંને મેરઠ પહોંચ્યા, જ્યાં ઉદ્ઘાટન સમારોહ સાથે એક જાહેર રેલીને પણ સંબોધન કરવામાં આવ્યું. આ પહેલા પ્રધાનમંત્રીએ મેરઠમાં અંદાજે ₹12,930 કરોડના વિકાસ પ્રોજેક્ટ્સનું ઉદ્ઘાટન અને શિલાન્યાસ કર્યો.પ્રધાનમંત્રી, મુખ્યમંત્રી અને NCRTCના અધિકારીઓએ શતાબ્દી નગરથી મેરઠ દક્ષિણ સુધી ‘નમો ભારત’ ટ્રેનમાં મુસાફરી કરી અને મુસાફરો સાથે સંવાદ કર્યો. અધિકારીઓએ રેપિડ રેલની કામગીરી, સુરક્ષા વ્યવસ્થા અને ભવિષ્યની યોજનાઓ અંગે માહિતી આપી.

‘નમો ભારત રેપિડ રેલ’માં મહિલા સશક્તિકરણ પર વિશેષ ધ્યાન આપવામાં આવ્યું છે. અંદાજે 80 ટકા ડ્રાઇવર સ્ટાફ મહિલાઓનો રહેશે. ટ્રેનમાં મહિલાઓ માટે ખાસ કોચ, વિશાળ સામાન જગ્યા, વધારાની ઊભા રહેવાની જગ્યા, પાણી બોટલ હોલ્ડર, મેગેઝિન સ્ટેન્ડ અને ફૂટરેસ્ટ જેવી સુવિધાઓ આપવામાં આવી છે.

ટેક્નોલોજીની દૃષ્ટિએ પણ આ રેલ અત્યંત આધુનિક છે. ટ્રેન 180 કિમી પ્રતિ કલાકની ગતિએ દોડી શકે છે, સંપૂર્ણ ડિજિટલ ડ્રાઇવર કન્સોલ ધરાવે છે અને પ્રીમિયમ કોચમાં મોબાઇલ-લેપટોપ ચાર્જિંગ પોઇન્ટ તથા સૂર્યપ્રકાશથી બચાવ માટે બ્લાઇન્ડ કર્ટેન્સ આપવામાં આવ્યા છે. સરાય કાલે ખાન સ્ટેશન પર સ્માર્ટ ટિકિટિંગ, QR કોડ આધારિત ટિકિટિંગ અને ભવિષ્યમાં દિલ્હી–અલવર તથા દિલ્હી–કરનાલ રેપિડ રેલ જોડાણ માટે છ પ્લેટફોર્મ તૈયાર કરવામાં આવ્યા છે. આ રીતે ‘નમો ભારત રેપિડ રેલ’ દિલ્હી–NCR વિસ્તારમાં આધુનિક, ઝડપી અને વિશ્વસ્તરીય પરિવહન તરફનું એક મોટું પગલું સાબિત થશે.