AI ઇમ્પેક્ટ સમિટ 2026માં પીએમ નરેન્દ્ર મોદી સાથે સ્ટેજ શેર કરનાર 29 વર્ષીય યુવા નેતા સૌની નજરમાં આવ્યા. તેમની ઉંમરથી વધુ તેમનું કામ અને વિઝન લોકોને આશ્ચર્યમાં મૂકી રહ્યું છે.

AI ઇમ્પેક્ટ સમિટ 2026નો ચોથો દિવસ વિશ્વભરના ટોપના ટેક નેતાઓ માટે ખાસ રહ્યો. ગૂગલના CEO Sundar Pichai, OpenAIના CEO Sam Altman અને Anthropicના CEO Dario Amodei જેવી જાણીતી હસ્તીઓ હાજર હતી. પરંતુ આ સમિટમાં સૌથી રસપ્રદ નામ હતું Alexander Wang મેટાના CEO Mark Zuckerberg ગેરહાજર રહ્યા, પરંતુ તેમની તરફથી ભારતમાં મેટાની સુપરઇન્ટેલિજન્સ ટીમનું પ્રતિનિધિત્વ એલેક્ઝાન્ડર વાંગે કર્યું.

એલેક્ઝાન્ડર વાંગ ઉંમરમાં સૌથી નાના હોવા છતાં સમિટના સૌથી પ્રભાવશાળી નેતાઓમાંના એક છે. તેઓ હાલમાં Metaમાં સુપરઇન્ટેલિજન્સ લેબ્સ (MSL)ના વડા છે અને કંપનીની ભવિષ્યની AI દિશા નક્કી કરે છે. PM Narendra Modi સાથે સ્ટેજ પર તેમની હાજરીએ સ્પષ્ટ સંકેત આપ્યો કે ભારત હવે વૈશ્વિક AI નકશામાં કેન્દ્રસ્થાને આવી રહ્યું છે.

વાંગે MITમાં અભ્યાસ અધવચ્ચે છોડી 2016માં Scale AIની સ્થાપના કરી. આ કંપની AI માટે ડેટા લેબલિંગ અને મોડેલ ટ્રેનિંગનું મહત્વપૂર્ણ કામ કરે છે. NVIDIA, Amazon અને Meta જેવી મોટી કંપનીઓ તેના ગ્રાહકો છે. આ સફળતાના કારણે વાંગની સંપત્તિ અંદાજે $3.2 થી $3.6 બિલિયન સુધી પહોંચી છે, જેના કારણે તેઓ વિશ્વના સૌથી યુવા અબજોપતિઓમાંના એક બન્યા.

2025માં મેટાએ Scale AIમાં આશરે $14.3 બિલિયનનું રોકાણ કરી લગભગ 49% હિસ્સો મેળવ્યો. આ સાથે વાંગને મેટાની સુપરઇન્ટેલિજન્સ લેબ્સનું નેતૃત્વ સોંપવામાં આવ્યું. આ સોદો AI ઉદ્યોગના સૌથી મોટા “ટેલેન્ટ એક્વિઝિશન” તરીકે જોવામાં આવ્યો.

વાંગનું માનવું છે કે ભારત AI અપનાવવાની દ્રષ્ટિએ સૌથી ઝડપી દેશોમાંનું એક છે. WhatsApp, Instagram અને Facebook પર AI ફીચર્સનો વ્યાપક ઉપયોગ થતો હોવાથી ભારત મેટા માટે મુખ્ય પરીક્ષણ કેન્દ્ર બની રહ્યું છે. તેમનો મુખ્ય ખ્યાલ છે પર્સનલ સુપરઇન્ટેલિજન્સ, એટલે કે ભવિષ્યમાં દરેક વ્યક્તિ પાસે પોતાનું વ્યક્તિગત AI હશે, જે શીખવા, નોકરી, વ્યવસાય અને દૈનિક જીવનમાં નિર્ણયો લેવા મદદ કરશે.

સુપરઇન્ટેલિજન્સ એવી AI છે જે માનવ બુદ્ધિથી પણ આગળ હશે. તે દવાઓની શોધ, રોગચાળો અને આબોહવા પરિવર્તન જેવા મુદ્દાઓમાં મોટો ફર્ક પાડી શકે છે. પરંતુ જો નિયંત્રણ ન રહે, તો જોખમ પણ એટલું જ મોટું છે. તેથી જ સલામતી અને માનવ નિયંત્રણ પર ભાર આપવામાં આવી રહ્યો છે.

શું તમે ક્યારેય કોઈ વાઘની શિવભક્તિ જોઈ છે? જો નથી જોઈ તો આજે અમે તમને એક વીડિયોના માધ્યમથી એક વાઘની શિવભક્તિ બતાવીશું. આ ઘટના મધ્ય પ્રદેશના એક જંગલની છે, જ્યાં વાઘ શિવલિંગ પર માથું ફેરવીને જાણે મહાદેવ પાસે કંઈક માંગી રહ્યો હોય. મધ્ય પ્રદેશના કટની જિલ્લાના ઢીમરખેડા તહસીલના સડાર જંગલોમાંથી એક ચોંકાવનારો વીડિયો સામે આવ્યો છે. જંગલમાં સ્થિત ભગવાન શિવના શિવલિંગ પર એક વાઘ પોતાનું માથું ફેરવી રહ્યો છે. વન્યજીવન અને ભક્તિના આ અનોખા સંગમનો વીડિયો હવે સોશિયલ મીડિયા પર વાયુ વેગે વાઈરલ થઈ રહ્યો છે.

સ્થાનિક ગ્રામીણોના જણાવ્યા પ્રમાણે આ દુર્લભ નજારો ગત બુધવારનો સાંજના સમયનો છે. સડાર ગામ નજીક સ્થિત જંગલમાં મહાદેવનું એક પ્રાચીન શિવલિંગ સ્થાપિત છે. વીડિયોમાં સ્પષ્ટ જોઈ શકાય છે કે, વાઘ ખૂબ જ શાંત સ્વભાવે શિવલિંગ પાસે પહોંચે છે અને ઘણાં સમય સુધી શિવલિંગ પર પોતાનું માથું અને જીભ ફેરવતો રહે છે.

સડાર અને આસપાસના ગ્રામીણ વિસ્તારોમાં વાઘ અને દીપડાની હાજરી એ કોઈ નવી નથી. વન વિભાગના અધિકારીઓ અને સ્થાનિક રહેવાસીઓના મતે આ વિસ્તારમાં વન્યજીવોની અવરજવર સતત રહે છે. જોકે, માનવ વસાહતોની આટલી નજીક વાઘનું આ વર્તન ચર્ચાનો વિષય બની ગયું છે. આ ઘટનાને કેટલાક લોકો ભક્તિ સાથે જોડી રહ્યા છે, તો બીજી તરફ વન અધિકારીઓનું માનવું છે કે જંગલી પ્રાણીઓ ઘણીવાર પોતાની ગંધ છોડવા અથવા ખંજવાળ હટાવવા માટે પથ્થરો અથવા ઠોસ વસ્તુઓ પર માથું ફેરવે છે.

આ વીડિયો વાઈરલ થયા બાદ એક તરફ લોકો તેને ચમત્કાર માનીને શેર કરી રહ્યા છે, તો બીજી તરફ આસપાસના વિસ્તારમાં ડરનો માહોલ છે. આ મામલે પાન ઉમરિયા રેન્જ ઓફિસર અજય મિશ્રાએ જણાવ્યું કે, આ વીડિયો સડાર ગામથી લગભગ 400 મીટર દૂરનો છે. પેટ્રોલિંગ ટીમો સતત ગતિવિધિઓ પર નજર રાખી રહી છે. ગામલોકોને સતર્ક અને સાવધ રહેવાની સલાહ આપવામાં આવી છે અને જંગલ તરફ ન જવા માટે કહ્યું છે.

પટિયાલા હાઉસ કોર્ટે ભારત મંડપમમાં આયોજિત ‘ઈન્ડિયા-AI ઈમ્પેક્ટ સમિટ’ દરમિયાન અર્ધનગ્ન હાલતમાં સરકાર અને વડાપ્રધાન નરેન્દ્ર મોદી વિરુદ્ધ પ્રદર્શન કરનારા યુથ કોંગ્રેસના 4 કાર્યકરોની જામીન અરજી ફગાવી દીધી છે અને તેમને 5 દિવસના પોલીસ રિમાન્ડ પર મોકલી આપ્યા છે. સુનાવણી દરમિયાન દિલ્હી પોલીસે આ કાર્યકરો અંગે મોટો દાવો કર્યો હતો. પોલીસે કોર્ટને જણાવ્યું કે, આ વિરોધ પ્રદર્શન નેપાળમાં થયેલા હિંસક ‘જેન-ઝી’ (Gen-Z) આંદોલનથી પ્રેરિત હતું, જેણે ત્યાંની સરકાર ઉથલાવી દીધી હતી.

દિલ્હી પોલીસના જણાવ્યા અનુસાર, આ પ્રદર્શન પાછળ મોટું ષડયંત્ર હોઈ શકે છે. અદાલતમાં પોલીસે દલીલ કરી હતી કે, આરોપીઓને સામસામે બેસાડીને અને ડિજિટલ પુરાવાઓ સાથે રાખીને પૂછપરછ કરવી જરૂરી છે. સાથે જ એ તપાસ પણ થવી જોઈએ કે આ પ્રદર્શન માટે ફંડિંગ ક્યાંથી આવ્યું અને ટી-શર્ટ છપાવવાનો ખર્ચ કોણે ઉઠાવ્યો. આ ટી-શર્ટ પર ‘PM is Compromised’, ‘India-US Trade Deal’ અને ‘Epstein Files’ જેવા સૂત્રો લખેલા હતા, જેમાં વડાપ્રધાન મોદી અને અમેરિકાના રાષ્ટ્રપતિ ડોનાલ્ડ ટ્રમ્પની તસવીરો પણ હતી.

કોંગ્રેસની વિદ્યાર્થી પાંખ નેશનલ સ્ટુડન્ટ્સ યુનિયન ઓફ ઈન્ડિયા (NSUI) ના લગભગ 10 કાર્યકરો શુક્રવારે ભારત મંડપમમાં પ્રવેશ્યા હતા અને સૂત્રોચ્ચાર કર્યા હતા. દિલ્હી પોલીસે આ મામલે યુથ કોંગ્રેસના ચાર કાર્યકરોની અટકાયત કરી હતી અને શનિવારે સવારે તેમને પટિયાલા હાઉસ કોર્ટમાં રજૂ કરી 5 દિવસના રિમાન્ડની માંગણી કરી હતી. આરોપીઓના વકીલે પોલીસના દાવાઓનો વિરોધ કરતા કહ્યું કે, પ્રદર્શન શાંતિપૂર્ણ હતું અને કોઈના પર હુમલો કરવામાં આવ્યો નહોતો. ઉલટું, પ્રદર્શનકારીઓ સાથે મારપીટ કરવામાં આવી હતી.

આ ઘટના બાદ ભાજપ અને કોંગ્રેસ વચ્ચે તીખું રાજકીય યુદ્ધ છેડાયું છે. કેન્દ્રીય મંત્રી પીયૂષ ગોયલ અને ભૂપેન્દ્ર યાદવ સહિત અનેક ભાજપના નેતાઓએ યુથ કોંગ્રેસના આ કૃત્યને ‘રાષ્ટ્રવિરોધી’ ગણાવ્યું હતું અને આંતરરાષ્ટ્રીય મહેમાનો સામે ભારતની છબી ખરાબ કરવાનો આરોપ લગાવ્યો હતો. ભાજપની યુવા પાંખ BJYM એ નવી દિલ્હીમાં કોંગ્રેસ મુખ્યાલય પાસે વિરોધ પ્રદર્શન કર્યું હતું અને ભિવંડીમાં રાહુલ ગાંધીને કાળા વાવટા બતાવ્યા હતા. બીજી તરફ, કોંગ્રેસે આ પ્રદર્શનને લોકશાહી અધિકાર ગણાવીને યુથ કોંગ્રેસના કાર્યકરોનો બચાવ કર્યો હતો.