જામનગરમાં ગાંધીનગર વિસ્તારમાં રહેતા એક મહિલા પોતાના ભાણેજના લગ્ન પ્રસંગમાં તિરુપતિ સોસાયટીમાં ગયા હતા, અને કરિયાવરની વિધિ ચાલી રહી હતી, જે દરમિયાન જમીન પરનું ફ્લોરિંગ સળગવા લાગતાં મહિલાની સાડીને તેની ઝાળ અડી ગઈ હતી, અને તેઓ પણ ગંભીર સ્વરૂપે તમામ જાનૈયાઓ ની વચ્ચે દાઝી ગયા હતા, અને સારવાર માટે હોસ્પિટલમાં ખસેડાતાં તેઓનું કરુણ મૃત્યુ નીપજ્યું છે. જે બનાવને લઈને લગ્ન સમારંભમાં ભારે સોંપો પડી ગયો હતો.

આ બનાવની વિગત એવી છે કે જામનગરમાં મચ્છર નગર વિસ્તારમાં રહેતા અને જીઆઇએસએફમાં સિક્યુરિટી ગાર્ડ તરીકે ફરજ બજાવતા સિધ્ધરાજસિંહ ભરતસિંહ જાડેજા (37) કે જેઓના ભાણેજ ના લગ્ન જામનગરના તિરૂપતિ સોસાયટી વિસ્તારમાં યોજાયા હતા.ગત 8મી તારીખે જાહેરમાં લગ્ન સમારંભ ચાલી રહ્યો હતો, અને માંડવામાં સિધ્ધરાજસિંહ ના પત્ની ભાવનાબા સિદ્ધરાજસિંહ જાડેજા (ઉ.વર્ષ. 34) કે જેઓ પોતાની ભાણેજના કરિયાવરની વિધિના પ્રસંગમાં હાજરી આપી રહ્યા હતા.

જે દરમિયાન નીચે જમીન પર પાથરેલું પ્લાસ્ટિકનું ફ્લોરિંગ કે તેમાં કોઈપણ રીતે આગ લાગી ગઈ હશે, અને સળગતું હશે, જેના ઉપર ભાવનાબાની સાડી નો છેડો અડી જતાં પાછળથી સાડી એકાએક સળગવા લાગી હતી, અને તેઓએ સાડીનું ડ્રાયકલીન કરાવી હોવાથી તેમાં કેમિકલ હોવાના કારણે આગ ક્ષણભરમાં જ તેઓની સાડીમાં પ્રસરી ગઈ હતી, અને સર્વે જાનૈયાઓની વચ્ચે તેઓએ ભારે બુમાબુમ કરીમૂકી હતી, અને ત્યાં હાજર રહેલા અન્ય કુટુંબીઓએ ઠારવાનો પ્રયત્ન કર્યો હતો, પરંતુ ક્ષણભરમાંજ ભાવનાબેન 70 ટકાથી વધુ દાઝી ગયા હતા, અને તેઓને તાત્કાલિક અસરથી સારવાર માટે જામનગરની સરકારી જી.જી. હોસ્પિટલમાં ખસેડવામાં આવ્યા હતા ત્યાં ગત 14મી તારીખે તેઓનું સારવાર દરમિયાન મૃત્યુ નીપજ્યું છે. આ બનાવને લઈને સમગ્ર પરિવારમાં ભારે ગમગીની છવાઈ હતી.

આ બનાવ અંગે મૃતક ભાવનાબા ના પતિ સિધ્ધરાજસિંહ જાડેજાએ પોલીસને જાણ કરતાં બેડી મરીન પોલીસ સ્ટેશનના પોલીસ હેડ કોન્સ્ટેબલ એસ. કે. જાડેજા સરકારી જી.જી. હોસ્પિટલમાં દોડી ગયા હતા, અને ભાવનાબા ના મૃતદેહનો કબજો સંભાળી આ બનાવ અંગે વધુ તપાસ હાથ ધરી છે. મૃતક ભાવનાબા ને 14 વર્ષ અને 13 વર્ષના બે સંતાનો છે, જેઓ માતા વિહોણા બની ગયા છે.

જામનગર માં તિરૂપતિ સોસાયટીમાં લગ્ન પ્રસંગમાં ભાવનાબા સિદ્ધરાજસિંહ જાડેજા નામના મહિલાનું વિચિત્ર અકસ્માતમાં દાઝી જવાથી મૃત્યુ નીપજ્યું હતું, જે બનાવમાં તેઓએ ડ્રાયક્લિન કરાવેલી સાડી મૃત્યુનું કારણ બની છે.

જે સાડીમાં કેમિકલ લગાવેલું હોવાથી જમીન પરનું ફ્લોરિંગ સળગવાથી સાડીમાં કેમિકલ હોવાના કારણે ક્ષણભરમાં જ સાડી સળગી ઊઠી હતી, અને તેની અગ્નિજવાળામાં ભાવનાબા સપડાઈ ગયા હતા, અને મૃત્યુ નિપજ્યું હતું.

કરમસદ-આણંદ મહાનગરપાલિકાની આરોગ્ય વિભાગની ટીમ દ્વારા વિવિધ ખાદ્ય એકમો ખાતે સ્વચ્છતાલક્ષી તપાસણી ઝુંબેશ શરૂ કરવામાં આવી છે. આ તપાસણી દરમિયાન સ્વછતાનો અભાવ અને પ્રતિબંધિત પ્લાસ્ટિક મળી આવતા ૧૫ જેટલા એકમો પાસેથી વહીવટી ચાર્જ પેટે કુલ રૂ. ૭૧,૦૦૦નો દંડ વસૂલ કરવામાં આવ્યો છે.

આ તપાસણી ઝુંબેશ અંતર્ગત મહાનગરપાલિકા વિસ્તારમાં આવેલા એકમોમાં જય અંબે દાળવડા, જય જલારામ ખમણ હાઉસ, એ જે. ફૂડ જંક્શન, બોમ્બે સેન્ડવીચ, પટેલ સેન્ડવીચ, બ્રહ્માણી લાઈવ વેફર્સ, એવર ફ્રેશ સ્પેશિયલ, છાશ વાલા, હેપ્પી વાલી ફીલિંગ, ડોમિનોઝ પિઝા અને કચ્છી દાબેલી ખાતે મહાનગરપાલિકાના આરોગ્ય વિભાગની ટીમ દ્વારા આકસ્મિક તપાસણી કરતા સ્વચ્છતાનો અભાવ જોવા મળ્યો હતો. જેને કારણે આ ખાદ્ય એકમો પાસેથી કુલ રૂપિયા ૫૯૦૦૦ અને પ્રકાશ મસાલા અને એવર ફ્રેશ બેકરી ખાતેથી પ્રતિબંધિત પ્લાસ્ટિકનો જથ્થો મળી આવતા કુલ રૂપિયા ૧૨,૦૦૦ મળીને શુક્રવારે મહાનગરપાલિકાના આરોગ્ય વિભાગની ટીમ દ્વારા કુલ ૧૫ જેટલા એકમો પાસેથી કુલ રૂપિયા ૭૧ હજારનો દંડ વસૂલ કરવામાં આવ્યો છે. મહાનગરપાલિકાના આરોગ્ય વિભાગના જણાવ્યા અનુસાર ખાદ્ય એકમો ખાતે તપાસણી ઝુંબેશ ચાલુ રહેશે, જેથી સ્વચ્છતા રાખવી અને પ્રતિબંધિત પ્લાસ્ટિકનો ઉપયોગ ન કરવા તાકીદ કરવામાં આવી છે.

ખેડા એલસીબીએ કમળા ચોકડી નજીક પંચર થયેલી કારમાંથી વિદેશી દારૂના બિયરના ૨૮૮ નંગ (કિંમત રૂ.૬૩,૩૬૦)નો જથ્થો જથ્થો ઝડપી પાડયો હતો. પોલીસે વિદેશી દારૂ તેમજ રૂપિયા બે લાખની ગાડી મળી કુલ રૂ.૩,૬૩,૩૬૦નો મુદ્દામાલ કબજે કર્યો હતો. આ બનાવ અંગે નડિયાદ ગ્રામ્ય પોલીસે ગુનો નોંધી વધુ કાર્યવાહી હાથ ધરી હતી.

ખેડા એલસીબી પેટ્રોલિંગમાં હતી, તે દરમિયાન બાતમી મળી હતી કે, ખાત્રજ ચોકડીથી અમદાવાદ તરફ એક કાર વિદેશી દારૂ ભરીને પસાર થનાર છે. જેથી પોલીસે વોચ ગોઠવી હતી. આ દરમિયાન બાતમી મળેલી કાર આવતા પોલીસે તેને ઉભી રાખવા ઈશારો કરતા ગાડીનો ચાલક યુટર્ન મારી વરસોલા ચોકડી થઈ કમળા ચોકડી તરફ નાસી ગયો હતો. કમળા ચોકડી નજીક કટમાંથી યુ ટર્ન લેવા જતા અચાનક ડ્રાઇવર સાઈડનું ગાડીનું ટાયર ફાટયું હતું. જેથી ગાડીનો ચાલક ગાડી મૂકી નાસી ગયો હતો. એલસીબી પોલીસે આ ગાડીની તલાસી લેતા વિદેશી દારૂના બિયરના ૨૮૮ ટીન (કિંમત રૂ.૬૩,૩૬૦) મળી આવ્યા હતી. જેથી પોલીસે વિદેશી દારૂ તેમજ રૂપિયા બે લાખની કાર સહિત રૂપિયા ૩,૬૩,૩૬૦નો મુદ્દામાલ કબજે કર્યો હતો. આ બનાવ અંગે એલસીબી ખેડા પોલીસની ફરિયાદ આધારે નડિયાદ ગ્રામ્ય પોલીસે ગુનો નોંધી કાર્યવાહી હાથ ધરી હતી.

ડાકોરમાં નગરપાલિકાના સત્તાધીશોની બેદરકારીને કારણે પ્રજા ત્રાહિમામ્ પોકારી ઉઠી છે. છેલ્લા ચાર મહિનાથી શહેરના અનેક વિસ્તારોમાં સ્ટ્રીટ લાઈટો બંધ હોવાથી અંધારપટ છવાયેલો છે, પરંતુ નવાઈની વાત એ છે કે નગરપાલિકાના ચીફ ઓફિસર પાસે આ અંગે કોઈ માહિતી જ નથી.

ડાકોર નગરપાલિકાના રહીશો ‘એ’ ગ્રેડનો ટેક્સ ભરતા હોવા છતાં તેમને લાઈટ, પાણી અને ગટર જેવી પાયાની સુવિધાઓ માટે વલખાં મારવા પડી રહ્યા છે. મોટાભાગના રહીશોને પાણી માટે પોતાના બોર બનાવવા પડયા છે, જ્યારે ગટર ઉભરાવાની સમસ્યા ઠેર-ઠેર જોવા મળી રહી છે. નંદનવન સોસાયટી સહિત વોર્ડ નંબર ૬માં લાંબા સમયથી લાઈટો બંધ છે, જેને કારણે સ્થાનિકોને ભાકે હાલાકી વેઠવા પડી રહી છે. સ્થાનિક આગેવાને સ્ટ્રીટ લાઈટ અંગે રજૂઆત કરી, ત્યારે ચોંકાવનારી વિગતો બહાર આવી હતી. પાલિકાના વાયરમેન જોસફભાઈના જણાવ્યા અનુસાર, પાલિકામાં છેલ્લા ચાર મહિનાથી ઈલેક્ટ્રિકનો કોઈ સમાન કે રિપેરિંગ મટીરીયલ જ લાવવામાં આવ્યું નથી. રહીશોનો આક્ષેપ છે કે, ચીફ ઓફિસર સંજયભાઈ પટેલને માત્ર રોડ-રસ્તા અને પેવરબ્લોક જેવા ‘કમિશન’ વાળા કામોમાં જ રસ છે. જનહિતના કામોમાં તેઓ ઉદાસીન છે. ચીફ ઓફિસરની કામગીરીથી મામલે ભાજપના શહેર પ્રમુખ અને અગ્રણીઓએ લેખિતમાં મુખ્યમંત્રી સુધી રજૂઆત કરી છે. રજૂઆતમાં જણાવાયું છે કે, ચીફ ઓફિસર છેલ્લા પાંચ વર્ષમાં બે વખત બદલાઈને ફરી ડાકોરમાં જ આવી ગયા છે અને વિકાસના કામોની ‘ઘોર ખોદી’ રહ્યા છે. ફરિયાદ બાદ હવે ચીફ ઓફિસરે માત્ર ઈલેક્ટ્રિક સામાન મંગાવવા માટે કર્મચારીની નિમણૂક કરવાની સૂચના આપી છે. ડાકોરવાસીઓ હવે સવાલ કરી રહ્યાં છે કે, તેમને અંધારપટમાંથી ક્યારે મુક્તિ મળશે?

 હોળી-ધૂળેટીના તહેવારોને લક્ષમાં રાખીને બુટલેગરો દ્વારા દારૂ ઘુસાડવાના નવા-નવા પેંતરા રચવામાં આવી રહ્યા છે. આ દરમિયાન સુરેન્દ્રનગર લોકલ ક્રાઈમ બ્રાન્ચ (એલસીબી)ને મળેલી ચોક્કસ બાતમીના આધારે સાયલા તાલુકાના સામતપર ગામ પાસે ઓપરેશન હાથ ધરવામાં આવ્યું હતું. નવા બની રહેલા ટોલ નાકા પાસે લાકડા ભરેલી એક શંકાસ્પદ ટ્રકને અટકાવી તલાશી લેતા, તેમાંથી લાકડાની આડમાં છુપાવેલો ઇંગ્લિશ દારૂનો મોટો જથ્થો મળી આવ્યો હતો.

પોલીસે ટ્રકમાંથી નાની-મોટી કુલ ૩,૮૧૬ બોટલ (કિં.રૂ.૩૯,૦૯,૫૦૪) ઝડપી પાડી છે. પોલીસે દારૂ, ટ્રક (૧૦ લાખ), મોબાઈલ અને ૧૨૦ મણ લાકડા મળી કુલ રૂ.૪૯,૧૯,૫૦૪નો મુદ્દામાલ સાથે આરીફ મુસાભાઇ લાખા (રહે. ગડુ ગામ, તા. માળીયા હાટીના, જિ.જુનાગઢ) અને ઉમરભાઈ જુસબ લાખા (રહે. જામવાળી ગામ, તા.માંગરોળ, જિ.જુનાગઢ)ની ધરપકડ કરી છે. આ જથ્થો હરિયાણાથી ભરીને જેતપુર પહોંચાડવાનો હતો.

આ ટ્રક હરિયાણાથી રાજસ્થાન અને ગુજરાતના મહેસાણા, બહુચરાજી, વિરમગામ, લખતર, સુરેન્દ્રનગર શહેર પસાર કરીને સાયલા સુધી પહોંચી હતી. જ્યાંથી આગળ જેતપુર પહોંચે તે પહેલા સાયલા ઝડપાઇ ગયો છે. સાયલામાં નવા પીઆઈ ઉપાધ્યાયની નિમણૂક બાદ એલસીબી દ્વારા થયેલી આ બીજી મોટી રેડ છે, જેને પગલે સ્થાનિક પોલીસની કામગીરી અને સતર્કતા સામે ગંભીર સવાલો ઊભા થયા છે. હાલ આ મામલે ઝડપાયેલા બંને શખ્સ, ટ્રકમાં દારૂ ભરી આપનાર તેમજ દારૂનો જથ્થો મંગાવનાર તથા તપાસમાં ખુલે તે તમામ સામે પ્રોહિબિશન એક્ટ હેઠળ ગુનો નોંધી વધુ તપાસ ચોટીલા પોલીસને સોંપવામાં આવી છે.