ગુજરાતમાં વેસ્ટર્ન ડિસ્ટર્બન્સથી હવામાન પલટાશે. 18 થી 20 માર્ચ દરમિયાન પ્રી-મોન્સૂન એક્ટિવિટીને કારણે કમોસમી વરસાદની આગાહી કરાઈ છે. તાપમાનમાં 5 ડિગ્રી સુધી ઘટાડો થશે.ગુજરાતમાં આકરી ગરમીનો સામનો કરી રહેલા લોકો માટે રાહતના સમાચાર આવ્યા છે. હવામાન વિભાગની આગાહી મુજબ, આગામી 5 દિવસમાં રાજ્યના તાપમાનમાં 2 થી 5 ડિગ્રીનો ઘટાડો નોંધાશે. વેસ્ટર્ન ડિસ્ટર્બન્સની અસરને કારણે માર્ચ મહિનામાં જ ‘પ્રી-મોન્સૂન એક્ટિવિટી’ શરૂ થવા જઈ રહી છે, જેના પગલે રાજ્યના અનેક જિલ્લાઓમાં હળવાથી મધ્યમ વરસાદની શક્યતા છે.

18 માર્ચ: કચ્છ, દેવભૂમિ દ્વારકા, મોરબી, જામનગર, બનાસકાંઠા, પાટણ અને સાબરકાંઠા જિલ્લાના છૂટાછવાયા વિસ્તારોમાં વરસાદી માહોલ જોવા મળશે.
19 માર્ચ: વરસાદનો વ્યાપ વધશે. સૌરાષ્ટ્રના કચ્છ, મોરબી, સુરેન્દ્રનગર, રાજકોટ, ભાવનગર, અમરેલી, ગીર સોમનાથ, બોટાદ અને દીવમાં વરસાદની શક્યતા છે. આ ઉપરાંત ઉત્તર અને દક્ષિણ ગુજરાતના બનાસકાંઠા, પાટણ, સાબરકાંઠા, છોટાઉદેપુર, ભરૂચ, વડોદરા, નર્મદા, તાપી, ડાંગ અને સુરતમાં ગાજવીજ સાથે વરસાદ પડી શકે છે.
20 માર્ચ: ગીર સોમનાથ, દીવ, અરવલ્લી, દાહોદ અને મહીસાગર જિલ્લામાં મેઘમહેર જોવા મળી શકે છે.

ખેડૂતોમાં ચિંતાનો માહોલ
એક તરફ ગરમીથી રાહત મળશે, પરંતુ બીજી તરફ માર્ચ મહિનામાં કમોસમી વરસાદની આગાહીથી ખેડૂતોના જીવ અદ્ધર થઈ ગયા છે. ખેતરમાં ઉભા રવિ પાકને નુકસાન થવાની ભીતિ સેવાઈ રહી છે. હવામાન પલટાને કારણે એપીએમસી (APMC) માં રાખેલા અનાજને સુરક્ષિત સ્થળે ખસેડવા માટે પણ તંત્ર દ્વારા સૂચનાઓ આપવામાં આવી રહી છે.

સાબરકાંઠા જિલ્લાના સરહદી વિસ્તારમાં એક એવી ઘટના બની છે, જે સાંભળીને કોઈપણનું કાળજું કંપી ઉઠે. ખેતરમાં કામ કરી રહેલી એક 17 વર્ષની સગીરાનું થ્રેસર મશીનમાં ફસાઈ જવાથી કરૂણ મોત નીપજ્યું છે. આ અકસ્માત એટલો ભયાનક હતો કે સગીરાનું માથું ધડથી અલગ થઈ ગયું હતું, જેને પગલે સમગ્ર પંથકમાં અરેરાટી વ્યાપી ગઈ છે.

ઘટના મળતી માહિતી અનુસાર, ગુજરાત-રાજસ્થાન સરહદ પાસે આવેલા કોટાડા વિસ્તારમાં એક શ્રમિક પરિવાર ખેતરમાં ઘઉં કાપણીનું કામ કરી રહ્યો હતો. આ પરિવારની દીકરી હીના (ઉંમર 17 વર્ષ), જે ધોરણ 11માં અભ્યાસ કરતી હતી, તે પણ ખેતરમાં પૂળા નાખવામાં મદદ કરી રહી હતી. ખેતરમાં ઘઉંના પૂળા થ્રેસરમાં નાખતી વખતે અચાનક હીનાનો દુપટ્ટો મશીનના ફરતા પટ્ટામાં ખેંચાઈ ગયો હતો.

દુપટ્ટો ખેંચાતાની સાથે જ સેકન્ડોના ભાગમાં હીનાનું માથું પણ મશીનની અંદર આવી ગયું હતું. મશીનની ગતિ એટલી તેજ હતી કે જોતજોતામાં દીકરીનું માથું ધડથી અલગ થઈ ગયું અને તેનું ઘટના સ્થળે જ કમકમાટીભર્યું મોત નીપજ્યું હતું. પોતાની નજર સામે જ વ્હાલસોયી દીકરીનો આવો અંત જોઈ પરિવાર પર આભ તૂટી પડ્યું છે.

આ ઘટના ખેતીકામ કરતા શ્રમિકો અને ખેડૂતો માટે લાલબત્તી સમાન છે. ખાસ કરીને બહેનો અને દીકરીઓએ ખેતીના મશીનો (થ્રેસર, કટર) પાસે કામ કરતી વખતે દુપટ્ટો, સાડી કે ઢીલા કપડાં બાબતે અત્યંત સાવધ રહેવું જોઈએ. નાનકડી ચૂંક જીવનભરનું સંતાપ આપી શકે છે. હાલમાં આ મામલે સ્થાનિક પોલીસે અકસ્માત મોતનો ગુનો નોંધી આગળની કાર્યવાહી હાથ ધરી છે.

મિડલ ઈસ્ટમાં યુદ્ધના કારણે ઊભી થયેલી એલપીજી ગેસની અછતની સીધી અસર શાળાઓના મધ્યાહન ભોજન પર ન પડે તે માટે રાજ્ય સરકાર એક્શન મોડમાં આવી છે. પીએમ પોષણ યોજનાના કમિશનરે તમામ જિલ્લા કલેક્ટરો અને મ્યુનિસિપલ કમિશનરોને પત્ર લખીને શાળાઓ અને સેન્ટ્રલાઈઝ્ડ કિચન માટે ગેસનો પુરવઠો કોઈપણ અવરોધ વિના અને પ્રાથમિકતાના ધોરણે પૂરો પાડવા સૂચના આપી છે.

પીએમ પોષણ યોજનાના સંયુક્ત કમિશનર એન.એસ. ગુપ્તા દ્વારા 13મી માર્ચ 2026ના રોજ બહાર પાડવામાં આવેલા પરિપત્રમાં સ્પષ્ટ કરવામાં આવ્યું છે કે, આ યોજના રાષ્ટ્રીય ખાદ્ય સુરક્ષા અધિનિયમ (NFSA) 2013 અંતર્ગત આવે છે. બાલવાટિકાથી ધોરણ 8 સુધીના બાળકોને નિયમિત ભોજન પહોંચાડવું એ રાજ્ય સરકારની કાનૂની બાંહેધરીરૂપ ફરજ છે. આથી, કોઈપણ સંજોગોમાં શાળાઓમાં રસોઈ બંધ થવી જોઈએ નહીં.

પરિપત્રમાં જણાવાયું છે કે, રાજ્યની શાળાઓમાં વિદ્યાર્થીઓ માટેનું ભોજન એલપીજી સિલિન્ડર પર રાંધવામાં આવે છે, જ્યારે એનજીઓ સંચાલિત શાળાઓમાં સેન્ટ્રલાઈઝ્ડ કિચન મારફતે ભોજન તૈયાર થાય છે. વૈશ્વિક અસ્થિરતાને કારણે ગેસ સપ્લાયમાં અડચણો આવી રહી છે, ત્યારે ગેસ એજન્સીઓને પીએમ પોષણ યોજનાના કેન્દ્રોને અગ્રતા આપવા આદેશ અપાયો છે. જિલ્લા પુરવઠા અધિકારીઓને ગેસ પુરવઠો સુનિશ્ચિત કરવા જવાબદારી સોંપવામાં આવી છે. સેન્ટ્રલાઈઝ્ડ કિચન માટે જરૂરી ઇંધણના જથ્થામાં કોઈ વિઘ્ન ન પડે તે જોવાની તાકીદ કરી છે.

આ ગંભીર મુદ્દે શિક્ષણ વિભાગ અને અન્ન તથા નાગરિક પુરવઠા વિભાગના નાયબ સચિવોને પણ જાણ કરવામાં આવી છે. તમામ મહાનગરપાલિકાઓના નાયબ કલેક્ટરોને આદેશ અપાયો છે કે તેઓ સ્થાનિક સ્તરે ગેસ સપ્લાય પર દેખરેખ રાખે જેથી બાળકોના પોષણ પર કોઈ વિપરીત અસર ન પડે.

ઉલ્લેખનીય છે કે 11 માર્ચે આણંદ જિલ્લાની આસોદર પ્રાથમિક કન્યા શાળાના આચાર્ય દ્વારા મધ્યાહન ભોજન યોજના (PM પોષણ યોજના) ખોરવાય નહીં તે માટે વહીવટી તંત્ર પાસે ગેસ સિલિન્ડરની માગ કરી હતી. અને આ ગંભીર મુદ્દે ગેસ એજન્સીને પત્ર લખીને જણાવ્યું હતું કે, માર્ચ 2026થી શાળાના મધ્યાહન ભોજન માટે પુરવઠામાં 6 રાંધણગેસના સિલિન્ડરની ફાળવણી તાત્કાલિક ધોરણે કરવામાં આવે. પી.એમ. પોષણ યોજના અંતર્ગત બાળકોને આપવામાં આવતા ભોજનમાં ગેસની અછતને કારણે મુશ્કેલીઓ સર્જાઈ રહી છે. ભવિષ્યમાં બાળકોનું ભોજન બંધ ન થાય તે માટે આ પૂર્વતૈયારીના ભાગરૂપે રજૂઆત કરાઈ હતી. સમય જતા રાજ્યના અનેક જિલ્લામાં આવી સમસ્યા સામે આવી હોવાથી સરકારે આ નિર્ણય લીધો હોઈ શકે છે.

ઉત્તર ગુજરાતમાં છેલ્લા ત્રણ દિવસથી ચર્ચાનું કેન્દ્ર બનેલી લોકગાયિકા કિંજલ રબારીના આંતરજ્ઞાતિ લગ્ન વિવાદમાં મોડી રાત્રે ચોંકાવનારો વળાંક આવ્યો છે. સુરક્ષાની માંગણી કરતી અને મક્કમતાથી વીડિયો બનાવતી કિંજલને આખરે બે સમાજના આગેવાનોની મધ્યસ્થી બાદ પરિવારને સોંપી દેવામાં આવી છે.રાધનપુરના સિનાડ ગામની વતની જાણીતી ગાયક કિંજલ રબારીએ અશોક ચૌધરી નામના યુવક સાથે પ્રેમલગ્ન કર્યા હતા. આ લગ્ન બાદ કિંજલે સોશિયલ મીડિયા પર વીડિયો શેર કરીને આક્ષેપ કર્યો હતો કે, તેને મારી નાખવાની ધમકીઓ મળી રહી છે. તેણે ગૃહ રાજ્યમંત્રી હર્ષ સંઘવી અને વિધાનસભા અધ્યક્ષ શંકર ચૌધરી પાસે રક્ષણની માંગ કરી હતી.

આ મામલે રબારી અને ચૌધરી સમાજ વચ્ચે તણાવ વધતા બંને સમાજના મોભીઓ અને આગેવાનોની એક મહત્વપૂર્ણ બેઠક યોજી હતી. લાંબી ચર્ચા અને સમજાવટ બાદ, ચૌધરી સમાજના આગેવાનોએ કિંજલને તેના પરિવારને પરત સોંપવાની બાહેંધરી આપી હતી.મોડી રાત્રે કિંજલ રબારી અને અશોક ચૌધરીને અલગ કરવામાં આવ્યા હતા. જે ઇન્સ્ટાગ્રામ એકાઉન્ટ પરથી કિંજલ કાયદાકીય લડત અને મક્કમતાની વાતો કરતી હતી, તે તમામ વીડિયો અને પોસ્ટ્સ એકાએક ડિલીટ કરી દેવામાં હતી. બંને સમાજ વચ્ચે વૈમનસ્ય ન ફેલાય તે હેતુથી આગેવાનોએ મધ્યસ્થી કરી મામલો થાળે પાડવાનો પ્રયાસ કર્યો છે.