આણંદના આંકલાવ તાલુકાના અંબાવ ગ્રામ પંચાયત દ્વારા ગામતળ અને સરકારી જમીનો પર થયેલા ગેરકાયદે દબાણો વિરુદ્ધ લાલ આંખ કરવામાં આવી છે. ગ્રામ પંચાયતની સામાન્ય સભાના ઠરાવ બાદ મંગળવારે પોલીસ બંદોબસ્ત સાથે વિવિધ સ્થળોએથી ગેરકાયદે દુકાનો અને મકાનોના દબાણો દૂર કરી જમીન ખુલ્લી કરવામાં આવી છે.

આંકલાવ તાલુકાના અંબાવ ગામે સરકારી અને ગામતળની જમીન પર થયેલા દબાણોને કારણે અનેક અરજદારો દ્વારા પંચાયતમાં રજૂઆતો કરવામાં આવી હતી. આ ફરિયાદોના અનુસંધાનમાં અંબાવ ગ્રામ પંચાયત દ્વારા દબાણકર્તાઓને નિયમોનુસાર ત્રણ નોટિસો પાઠવવામાં આવી હતી. તેમ છતાં દબાણ દૂર ન થતા, ગત તા. ૨૪-૦૨-૨૦૨૬ની સામાન્ય સભામાં લેવાયેલા નિર્ણય મુજબ તા. ૧૦-૦૩-૨૦૨૬ના રોજ બપોરે કડક કાર્યવાહી કરવામાં આવી હતી. સરપંચ, ડેપ્યુટી સરપંચ અને સભ્યોની ઉપસ્થિતિમાં પોલીસ બંદોબસ્ત સાથે ગેરકાયદે બાંધકામો હટાવીને સરકારી જગ્યા સંપૂર્ણપણે ખુલ્લી કરવામાં આવી છે. આ અંગેનો અહેવાલ અને પંચક્યાસની નકલ તાલુકા વિકાસ અધિકારી તેમજ મામલતદાર આંકલાવને જાણ અર્થે મોકલી આપવામાં આવી છે

ધ્રાંગધ્રા હાઈવે પર સોલડી ટોલ ટેક્સ નજીક થયેલી મહિલાની હત્યાના પ્રકરણમાં પોલીસે હત્યારા શખ્સ મેરુભાઈ વિઠ્ઠલભાઈ વાઘેલાને ઝડપી પાડી રિમાન્ડની માંગણી કરતા કોર્ટે રિમાન્ડ મંજૂર કર્યાં છે.

પ્રાથમિક તપાસમાં બહાર આવ્યું છે કે, આરોપી પોતે પણ દેહ વ્યાપારના વ્યવસાય સાથે સંકળાયેલો હતો. રવિવારે રાત્રે ગ્રાહકો બાબતે થયેલી ઉગ્ર બોલાચાલી દરમિયાન મહિલાએ આરોપીને લાફો મારતા, ઉશ્કેરાયેલા મેરુએ છરીના ઘા ઝીંકી મહિલાની હત્યા કરી નાખી હતી.

આ હત્યાકાંડે હાઈવે પર છેલ્લા ઘણા સમયથી ચાલતા દેહ વ્યાપારના નેટવર્કનો પર્દાફાશ કર્યો છે. અવાવરું જગ્યાએ ચાલતી આ અનૈતિક પ્રવૃત્તિઓથી સ્થાનિક પોલીસ અજાણ હોવાની ચર્ચાઓએ જોર પકડયું છે. પોલીસે ગણતરીની કલાકોમાં જ ધોળીધાર વિસ્તારના શખ્સને દબોચી લીધો હતો. હાલમાં પોલીસ આ પ્રકરણમાં અન્ય કેટલા લોકો સંડોવાયેલા છે અને આ વ્યવસાય પાછળ કોનું પીઠબળ છે તે દિશામાં ઉંડી તપાસ ચલાવી રહી છે.

ખાડી યુધ્ધના કારણે ગેસ સપ્લાયની શોર્ટેજ સર્જાઇ છે. એલપીજી ગેસના બોટલોનો સ્ટોક કરવા તેના બુકિંગ માટે ગ્રાહકો દ્વારા ગેસ એજન્સી પર ધસારો વધ્યો છે આ સાથે જ પુરવઠા ખાતુ પણ સક્રિય થઇ ગયું છે અને એલપીજી સ્ટોકનો જથ્થો જાળવી રાખવા ઓઇલ કંપનીઓને સૂચના આપી છે.

ઉલ્લેખનીય છે કે યુધ્ધના કારણે ગેસ સપ્લાયને મોટી અસર પડી છે અને તેના કારણે ઔદ્યોગિક તેમજ કોમર્શિયલ ગેસની સપ્લાય પર કન્ટ્રોલ કરવામાં આવ્યો છે જ્યારે ઘરગથ્થુ ગેસની સપ્લાય પર કોઇ અસર નથી તેમ છતાં યુધ્ધના પગલે લોકોમાં ગભરાટ ફેલાયો હોવાથી ગેસના બોટલોનો સ્ટોક કરવા માટે આજે ગ્રાહકોએ ગેસ એજન્સીઓ તરફ દોડ લગાવી હતી.

એલપીજી ગેસના બોટલ માટે સરકારે બુકિંગની સમયમર્યાદામાં વધારો કરતા જ લોકોમાં પેનિક ફેલાયો છે અને આગળના દિવસોમાં તકલીફ સર્જાશે તેમ માની જેટલા બોટલો ઘરમાં એકત્ર થાય તે કરવા માટે દોડાદોડી કરવા લાગ્યા છે. ગેસ એજન્સીઓમાં કેટલાક સ્થળે ઓનલાઇન બુકિંગ સિસ્ટમ બંધ થતા જ લોકોએ સ્થળ પર જઇને બુકિંગ કરવા માટે આજીજી કરવી પડી હતી.દરમિયાન પુરવઠા વિભાગ દ્વારા આઇઓસીએલ, બીપીસીએલ અને એચપીસીએલના માર્કેટિંગ અધિકારીઓની એક મિટિંગ સવારે લેવામાં આવી હતી. આ બેઠકમાં ત્રણે કંપનીઓના અધિકારીઓએ બાંહેધરી આપી હતી કે ડોમેસ્ટીક એલપીજી બોટલનો પ્રશ્ન નથી આ જથ્થો પૂરતો ઉપલબ્ધ છે, માત્ર કોમર્શિયલ બોટલ પર કંન્ટ્રોલ કરાયો છે જેથી ભવિષ્યમાં પ્રશ્ન ના સર્જાય. 

ધ્રાંગધ્રા શહેરના મુખ્ય પ્રવેશદ્વાર પર મસમોટા ખાડાઓએ વાહનચાલકો અને રાહદારીઓની હાલત કફોડી કરી દીધી છે. કચ્છ, મોરબી અને હળવદ જેવા મહત્વના શહેરોને જોડતા આ મુખ્ય માર્ગ પર પ્રવેશતા જ વાહનચાલકોને ભારે હાલાકીનો સામનો કરવો પડી રહ્યો છે.

સ્થાનિકોના જણાવ્યા અનુસાર, આ રોડનું નિર્માણ હજુ થોડા સમય પહેલા જ કરવામાં આવ્યું હતું, છતાં ટૂંકા ગાળામાં રોડની હાલત દયનીય બની ગઈ છે.ખાસ કરીને ટુ-વ્હીલર ચાલકો માટે આ ખાડાઓ જીવલેણ સાબિત થઈ શકે તેમ છે, જેના કારણે અકસ્માતનો ભય સતત તોળાઈ રહ્યો છે. આ ગંભીર મુદ્દે તંત્રને વારંવાર રજૂઆતો કરવા છતાં, જવાબદાર વિભાગો એકબીજા પર દોષારોપણ કરીને કામગીરી ટાળી રહ્યા છે. શહેરની છબી ખરડતા આ પ્રવેશ માર્ગનું તાત્કાલિક સમારકામ કરવામાં આવે તેવી લોકમાંગ ઉઠી છે. જો વહેલી તકે ખાડા પૂરવામાં નહીં આવે તો મોટા અકસ્માતની ભીતિ સેવાઈ રહી છે.